НҰР-СҰЛТАН, 12 ақпан – Sputnik. Камила Валиева – ресейлік мәнерлеп сырғанаушы және Бейжің Олимпиадасында әзірше командалық жарыс чемпионы. Бұл титул спортшыға толығымен беріле ме және 15 жастағы спортшыны жеке жарысқа жібере ме, оны Спорт төрелік соты шешеді.
Валиеваның жаттықтырушысы Этери Тутберидзе допинг қолданды деген айып тағылған өз шәкіртінің кінәсіздігіне сенетінін мәлімдеді.
"Өте қиын әрі кереғар жағдай қалыптасты. Сұрақ көп, бірақ жауап аз. Біз Камиланың кінәсіздігіне толығымен сенімдіміз. Қандай да бір міндетті іс-қимыл хаттамасы бар екенін жақсы түсінемін. Біз спортшыны жалғыз қалдырмаймыз", - деді Этери Тутберидзе.
Біраз бұрын халықаралық допинг-тест агенттігі (ІТА) ресейлік спортшының триметазидинге тапсырған тест нәтижесі оң болғанын хабарлады. Бұл сынама 2021 жылдың желтоқсанында Ресей чемпионатында алынған.
Тутберидзе "күмәнді допинг нәтижесі бар спортшыға 25 желтоқсанда Олимпиада ойындарына қатысуға неге жолдама берілгені түсініксіз" екенін айтты. Оның пікірінше, "бұл мұқият орындалған жоспар".
Ал сынаманы тексерген Швеция сынама нәтижесінің кешігуіне швед қызметкерлерінің ұжымында коронавирус эпидемиясы әсер еткенін мәлімдеді.
"Қазір бүкіл команда Камила Валиеваға қатысты шығатын шешімді тағатсыздана күтіп оты. Біз кесірі тимес үшін қандай да бір пікір білдіруден бас тартып отырмыз. Кім, не шешетінін білмеймін. Әділдік орнайды деп үміттенеміз", - деді Валиеваның жаттықтырушысы.