НҰР-СҰЛТАН, 8 ақпан – Sputnik. Қазақстанның цифрлық теңгесі пайда болады. Бұл туралы Ұлттық банк басшысы Ғалымжан Пірматов мәлімдеді, деп хабарлайды Sputnik Қазақстан тілшісі.
"2021 жылы Ұлттық банк цифрлық теңгені енгізу жөніндегі пилоттық жобаға бастамашылық жасады. Қазіргі уақытта платформаның прототипін әзірлеу аяқталды", - деді Пірматов үкіметтің кеңейтілген отырысында.
Айтуынша, биыл пайда мен шығыстарды бағалай отырып, цифрлық теңгені енгізу моделі бойынша қорытынды шешім әзірленеді.
Айта кетері, елордада мемлекет басшысы Қасым-Жомарт Тоқаевтың төрағалығымен үкіметтің кеңейтілген отырысы өтіп жатыр. Жиын барысында Қазақстанның былтырғы әлеуметтік-экономикалық дамуының қорытындылары туралы есеп беріледі және үкіметтің 2022 жылға арналған іс-қимыл жоспары қарастырылып жатыр.
Отырыста үкімет басшысы Әлихан Смайылов келесі жылдан бастап су тұтыну көлеміне сараланған тариф енгізілетінін айтты.
"Су ресурстарына ұқыпты қарау және объективті ақы белгілеу үшін 2023 жылдан бастап су тұтыну көлемі бойынша сараланған тариф енгізіледі", - деді премьер-министр.
Сонымен қатар, айтуынша, коммуналдық төлемдерді төлеу кезінде халықтың көмекке мұқтаж санаттарын жеке топқа бөлу жоспарланып отыр.