НҰР-СҰЛТАН, 7 ақпан – Sputnik. Білім және ғылым министрі Асхат Аймағамбетов халықаралық олимпиада жеңімпаздарына жоғары оқу орнына грантқа түсу мүмкіндігін беретін заң мәжіліске енгізілгенін айтты, деп хабарлайды Sputnik Қазақстан тілшісі.
"Дарынды балаларды қолдау мақсатында халықаралық олимпиадалардың жеңімпаздарына, сондай-ақ жаттықтырушыларға қаржылай сыйақы төлеуді көздейтін заң жобасы әзірленіп, мәжіліске енгізілді. Қабылданған шаралармен қатар жеңімпаздарға ҰБТ тапсырмай-ақ, жоғары оқу орындарына грантқа түсу мүмкіндігін беруді жоспарлап отырмыз", - деп жазды Аймағамбетов әлеуметтік желідегі парақшасында.
Министрдің айтуынша, былтыр мемлекеттік білім беру гранттарының саны 5 000-ға өсті. Биыл да гранттар саны осындай көлемде артады.
"Грант бөлу кезінде "merit based"-ке ғана емес, "need based"-ке де назар аударамыз. Мәселен, алғаш рет квота бойынша білім беру гранттары жалпы санының 5%-і көпбалалы отбасылардан шыққан балаларға, 1%-і толық емес отбасылардан шыққан балаларға бөлінеді", - деп атап көрсетті Аймағамбетов.
Биыл қыркүйек айында шәкіртақының мөлшері тағы да артады.