НҰР-СҰЛТАН, 20 қаңтар – Sputnik. Жамбыл облысы полиция департаментінің қызметкерлері жедел-іздестіру іс-шараларын жүргізу барысында Жамбыл ауданы Қостөбе ауылының маңынан жасырылған қару-жарақ тапты.
Біреулер 8 автомат пен оған арналған 17 оқ, 1 граната, 12 калибрлі газ-травматтық қару, "Krall" маркалы мылтық пен 1 дана пышақты қапқа салып, жерге көміп кеткен.
"Аталған дерек бойынша Қылмыстық кодекстің 287-бабы 3-бөлігі бойынша сотқа дейінгі тергеп-тексеру амалдары жүргізілуде. Сот-баллистикалық сараптама тағайындалды" - делінген хабарламада.
Жамбыл облысының полиция департаменті қарудың, оқ-дәрілердің, арнайы құралдардың орны туралы хабарлаған немесе оларды полицияға өз еркімен тапсырған адам қылмыстық және әкімшілік жауапкершілікке тартылмайтынын еске салады.