НҰР-СҰЛТАН, 19 қаңтар – Sputnik. Ақтөбе облысының полициясы наразылықтар кезінде әкімдікке басып кірген адамдардың видеосын жариялады, деп хабарлайды Sputnik Қазақстан тілшісі.
Бүлікшілер ғимараттың тас-талқанын шығарған. Бірнеше адам портреттерді бөтелкемен тесіп тастаған. Одан кейін кезек-кезек таптап өткен.
"Биыл 5 қаңтарда митинг кезінде наразылық білдірушілер Ақтөбе облысы әкімдігінің ғимаратын басып алды. Бірнеше кабинетті қиратып, тұрмыстық техниканы ұрлап, зақымдады. Олардың жиһаз мен терезелерді сындырғаны видеода көрініп тұр", - дейді полицейлер.
Кадрда бір топ жас полицияны ұрып жүр. Тәртіп сақшылары бір бөлмеге тығылуға мәжбүр болды. Бірақ бүлікшілер тоқтаған жоқ. Есік-терезесін бұзып, ішкі қарай өтуге тырысты. Бір адамның оларды тоқтатып жатқаны анық көрінеді.
Ақтөбе облыстық әкімдіктің мәліметіне сәйкес, ғимараттың іші және сырты зақымданды. Шығынның көлемі, шамамен, 300 миллион теңгені құрап отыр.