НҰР-СҰЛТАН, 16 қаңтар – Sputnik. Алматыда жаппай тәртіпсіздік кезінде 1347 қару ұрланды. Бұл туралы Алматы полиция департаментінің басшысы Қанат Таймерденов мәлімдеді.
"Террористер 7 қару-жарақ дүкенін басып алды. 1 347 қару ұрланған. Оның ішінде 501 мылтық, 807 тегіс ұңғылы, 39 газ травматикалық қару", - деді Таймерденов брифингте.
Тәртіпсіздік кезінде 356 көлік зақымданған. Оның 163-і полицияның қызметтік көлігі.
Таймерденов полиция департаментін басып алу мақсатында 27 шабуыл ұйымдастырылғанын айтты.
Ол Алматыдағы оқиға кезінде атыс-шабуыл туралы жалған хабарламалардың көп түскенін атап өтті.
"Лаңкестер Алматы халықаралық әуежайын басып алды. Сауда-ойын сауық орталықтары мен қаржы орталықтарына шабуыл жасалды. Қаланың әр түкпірінде бір мезгілде әртүрлі ғимараттарға мина қойылған. Осы күндері атыс-шабуыл туралы жалған хабарламалардың көптеп түскенін атап өткім келеді. Бұл тактиканы лаңкестер полицияны шаршатып, күштерді осал етуі үшін қолданған", - деді департамент бастығы.