НҰР-СҰЛТАН, 15 қаңтар – Sputnik. Қазіргі уақытта 67 адам ауыр хәлде жансақтау бөлімінде жатыр, деп мәлімдеді денсаулық сақтау министрлігі.
Төтенше жағдай енгізілген сәттен бастап 2 678 адам медициналық көмекке жүгінді.
"Оның ішінде амбулаториялық көмекке 1 815, стационарлық емдеуге 863 адам жүгінді. 598 науқас үйге шығарылды. 265 адам ем алуды жалғастыруда. 67 адам ауыр хәлде жансақтау бөлімінде жатыр", - деді денсаулық сақтау министрлігінің қоғаммен байланыс департаментінің директоры Әсел Артакшинова.
Айтуынша, 500-ден астам күрделі операция жасалған. Бүлік кезінде қаза болған 225 адамның 170-сі медициналық ұйымдарда көз жұмған.
"Кейбір зардап шеккендер дәрігерлердің сұрақтарын түсінбей, мемлекеттік және орыс тілдерінде жауап бермеген. Медициналық көмек алғаннан кейін медициналық ұйымдардан рұқсатсыз кетіп, тіпті белгісіз қарулы адамдардың сүйемелдеуімен жансақтау бөлімшесінен шыққан жағдайлар болды", - деді ол.
Сонымен қатар жаппай тәртіпсіздіктер кезінде денсаулық сақтау нысандарына 20 шабуыл жасалғаны белгілі болды.
Қазақстанның бас прокуратурасы қазіргі уақытта 546 қылмыстық іс тергеліп жатқанын, 672 күдікті ұсталып, оның 446-сы соттың санкциясымен қамауға алынғанын хабарлады.