АЛМАТЫ, 14 қаңтар – Sputnik. Алматыда такси жүргізуші тонаушыны анықтауға көмектесті, деп хабарлады Polisia.kz сайты.
Жаппай тәртіпсіздікке қатысушының қару-жарақ дүкенін тонағаны анықталды.
"Әуезов ауданы полиция қызметкерлері И. есімді ер адам жаппай тәртіпсіздіктерге және басқа да заңсыз әрекеттерге белсенді қатысқанын, сонымен қатар ірі қару-жарақ дүкенін тонап, одан 10 патроны бар "BrowntnG" тегіс ұңғылы мылтығын ұрлап кеткенін анықтады", - деп хабарлады полиция.
Ер адам мылтықты №5 ықшам аудандағы ауланың біріндегі қоқыс жәшігіне тығып қойған.
Бірнеше күннен кейін күдікті таксиге отырып, мылтық жасырынған жерге келген. Көлік жүргізуші жолаушының теледидар қорабына қару жасырып жүргенін байқап, полицияға хабарлаған.
"Тұтқындау кезінде И. есімді ер адам әскери киімде болған. Оны қайдан алғанын тергеу анықтайды. Қазір аталған факті бойынша сотқа дейінгі тергеу амалдары жүргізіліп жатыр. Ұсталған азамат уақытша ұстау изоляторына қамалды. Алматы қаласының комендатурасы мұндай оқиғаларға бей-жай қарамайтын азаматтарға алғыс білдірді", - делінген ақпаратта.