НҰР-СҰЛТАН, 7 қаңтар – Sputnik. Мемлекет басшысы Қасым-Жомарт Тоқаев лаңкестікке қарсы штабтың отырысын өткізді, деп хабарлайды Ақорда.
Бүгін, 7 қаңтар таңғы сағат 7:00-де Тоқаев Ақорда резиденциясында президент әкімшілігінің, Қауіпсіздік кеңесінің және күштік құрылымдар басшыларының қатысуымен кеңес өткізді.
"Антитеррор операциясы басталды. Күштік құрылымдар қауырт жұмыс атқарып жатыр. Негізінен бүкіл өңірде конституциялық тәртіп қалпына келтірілді. Жергілікті органдар жағдайды бақылауда ұстап отыр. Алайда лаңкестер қару қолданып, азаматтардың жеке мүлкіне залал келтіруде. Сондықтан лаңкестікке қарсы іс-қимылдар содырларды толық жойғанша жалғаса береді", - деді Тоқаев.
Құрылымдық күштер басшыларының хабарлауынша, жалпы тәртіпті реттеуге атсалысу үшін Қазақстанға ҰҚШҰ-ның біріккен бітімгерлік әскери күштері келе бастады. Олар стратегиялық нысандардың қорғалуын қамтамасыз ету үшін белгілі бір шектеулі мерзімге ғана келді.
Тоқаев еліміздегі жағдайды одан әрі тұрақтандыру жөнінде бірқатар нұсқау берді.