Қазақстан 2021 жылы коронавируспен қалай күресті – фото

2021 жылды қазақстандықтар коронавирусқа қарсы вакцина салдырумен бастады. Бірінші ақпаннан бастап ел тұрғындары "Спутник V" вакцинасын салдырды. Алғашқы кезеңде жұқпалы аурулар ауруханасы, жедел жәрдем қызметкерлеріне вакцина салынды.

Бірінші ақпанда алғашқылардың бірі болып Алматының бас санитар дәрігері Жандарбек Бекшин коронавирусқа қарсы вакцина салдырды. Сондай-ақ осы күні Алматы қаласы әкімінің орынбасары Ержан Бабақұмаров пен қалалық қоғамдық денсаулық сақтау басқармасының басшысы Нариман Табынбаев "Спутник V" вакцинасын салдырды.

Ақпанның соңында Қарағанды фармацевтикалық зауытында коронавирусқа қарсы "Спутник V" ресейлік вакцинаның қазақстандық нұсқасын шығару бойынша жұмысты бастады.

Медицина қызметкерлерінен кейін коронавирусқа қарсы вакцина педагогтерге салына бастады. 1 наурыздан бастап жалпы білім беретін мектептердің, жоғары оқу орындарының оқытушылары вакцина салдырды.

Халықты жаппай вакциналау қарқынын күшейту үшін вакцинаны тек медицина мекемелерінде ғана емес, сауда ойын-сауық орталықтарында, мешіт, базарларда салуға рұқсат берілді.

Сәуірде сол кездегі денсаулық сақтау министрі Алексей Цой 10 миллион адамға вакцина салу жоспарын бөлісті. Министр қыркүйекке дейін елде 10 миллион адам вакцина салдырады деп мәлімдеді.

26 сәуірден бастап Қазақстанда отандық QazVac препаратымен ерікті вакцинация басталады.

Медицина қызметкерлерінен кейін коронавирусқа қарсы вакцина педагогтерге салына бастады. 1 наурыздан бастап жалпы білім беретін мектептердің, жоғары оқу орындарының оқытушылары вакцина салдырды

Сәуірдің соңында бас дәрігердің қаулысы бойынша вакцинаның екі дозасын салдырған адамдарға бірқатар жеңілдіктер қарастырылды. Қазақстан азаматтары мен тұруға ықтиярхаты бар адамдар үшін ПТР-тестсіз Қазақстан аумағына кіруге рұқсат етілді.

Қытайда өндірілген Coronavac вакцинасының алғашқы партиясы Алматыға бірінші маусымда жеткізілді. Sinovac Biotech Ltd компаниясы шығарған Қытайдан арнайы бортпен келді. Вакцинаның бірінші партиясына 500 мың доза кірді.

Содан кейін халықты вакцина салуға ынталандыру мақсатында қала және облыс әкімдіктері түрлі ұтыс ұйымдастыра бастады. Оның ішінде пәтер, қымбат ұялы телефон, үй жиһаздары секілді заттар берілді.

Коронавирус инфекциясына қатысты жағдай тұрақталған соң 2021-2022 оқу жылында оқушылар мектепке оралды. Алайда оларға қатаң талаптар қойылды. Мектепте оқушылар мен мұғалімдер медициналық бетперде тағып жүруі қажет, мектеп аумағына бөгде адамға кіруге болмайды.

Мемлекет басшысы Қасым-Жомарт Тоқаев 2021 жылғы халыққа жолдауында пандемиядан кейінгі кезеңдегі экономикалық даму мәселесін көтерді. Орталық Азиядағы экономикасы ең ауқымды ел саналатын Қазақстан қазір пандемияның зардабын тартуда. Дегенмен, қиындықтарға қарамастан, бағдарымызды берік ұстанып келеміз, деді Тоқаев жолдауында.

Қазанда Қазақстанда коронавирусқа қарсы вакцинаны жасөспірімдер мен жүкті әйелдерге салуға рұқсат берді. Ол үшін арнайы Pfizer вакцинасы жеткізілді.

3 қыркүйекте вакцинациядан өтпеген нысандар мен мекемелердің қызметкерлері күндізгі режимде жұмысқа жіберілмейтіні туралы Қазақстанның бас санитар дәрігері Ерлан Қиясовтың қаулысы жарияланды. Сонымен қатар қызмет көрсету саласының вакцина салдырмаған қызметкерлері 7 күнде 1 рет ПТР тапсыруы міндеттелді.

Жыл соңына қарай әлемде коронавирустың омикрон штамы тарағаны белгілі болды. Соған байланысты санитар дәрігердің Қазақстанға "омикрон" штамын кіргізбеу шаралары туралы соңғы қаулысында шетелден ұшып келетін жолаушыларға ерекше шектеулер қолданылады. Қазақстанға келген және соңғы 14 күн ішінде Австралия, Бельгия, Ұлыбритания, Германия, Египет, Израиль, Италия, Канада, Нидерланды, Чехияға барған адамдар 7 күн бойы үйде оқшауланады (үй карантині). Бұл елдерден келген жолаушылар коронавирусқа қарсы вакцинасы және теріс нәтиже шыққан ПТР-анықтамасы болғанына қарамастан, үй карантиніне жіберіледі.