Таңдай қақтырған Түрген шатқалының қыстағы келбеті – таңғажайып суреттер

Алматы облысындағы Түрген шатқалы – саф ауаның мекені. Еңбекшіқазақ ауданы Түрген ауылынан оңтүстік-шығысқа қарай шамамен 11 шақырым жерде орналасқан шатқалдан қысы-жазы адам аясы үзілмейді.

Түрген шатқалы Іле Алатауының басты жотасының теріскей бөктерлерінен басталып 49 шақырымдай созылып жатыр. Шатқалдың солтүстік-шығыс шекарасы Сарытау жотасынан басталып, қырқалар арқылы Асы үстіртіне дейін жалғасады.

Түрген шатқалының қысы да ерекше. Ағаштар аппақ түске боялып, табиғат бір сәт тынышталады.

Түрген шатқалында түрлі ағаштар өседі, арасында құрғақшылыққа төзімді Семенов үйеңкісі, Сиверс алмасы, жабайы өріктер жиі кездеседі. Одан бөлек қайың мен терек, қылқанжапырақтылардың түрлері де бар.

Жануарлардан Түрген шатқалында қоян, борсық, тиын, қабан, тауешкі, қасқыр, аю және жылан мен құстың түрлерін кездестіруге болады.

Түрген шатқалында Түрген өзені бар. Іле Алатауының мұздықтарынан бастау алатын екі ірі – Шың Түрген және Кіші Түрген өзендерінің түйіскен жерінен басталатын Түрген өзені шатқал бойымен ағып өтеді. Өзенге шатқалдың ортаңғы бөлігінде оң жағынан атауы жоқ бір тармақ келіп құяды, онда "Аюлы" сарқырамасы орналасқан, ал одан төменірек сол жағында Теріскенсу өзенінің тармағы қосылады.

Түрген шатқалына жеңіл көлікпен Алматыдан 2-3 сағатта жетуге болады.

Түрген шатқалына экскурсия кезінде жылқыға мініп, шатқалдың кең байтақ жерін аралауға мүмкіндік бар. Туристер мен қала тұрғындарына керек барлық жағдай жасалған.

Ауа температурасына келер болсақ, мұнда Алматыға қарағанда салқын болады. Мысалы, 17 желтоқсанда Алматыда атүнде ауа температурасы -4 градус болса, Түргенде -8 градусқа жетеді.

Түрген шатқалы тек демалуға ғана емес, емделуге де өте қолайлы жер. Іле Алатауынан бастау алатын Түрген өзенінің ағысы қатты, орташа ағу жылдамдығы 3 м/с. Өзеннің жағалауын қаулай Тянь-Шань шыршасы өседі.

Түргенде барлығы жеті сарқырама бар. Ішінде "Аюлы" және "Қайрақты" сарқырамасы ең биігі саналады.