НҰР-СҰЛТАН, 13 желтоқсан – Sputnik. Қарағандыда көлік ұрлаған әйел ұсталды, деп хабарлайды Polisia.kz.
6 желтоқсан күні сағат 23.00 шамасында Қарағанды қаласының полициясына Мұқанов көшесіндегі көпқабатты үйдің ауласынан белгісіз біреу көлікті ұрлап кеткені туралы хабарлама келіп түскен.
Оқиға орнына жақын жерде болған Қарағанды қаласының ПБ патрульдік полиция полкінің жеке құрамы ұрланған көлікті іздестіруге кірісті.
Жәбірленуші – 47 жастағы ер адам досына қонаққа келіп, көлікті үйдің алдына қалдырған.
Көп ұзамай көшелердің бірінде полицейлер іздеудегі көлікті тапты. 26 жастағы әйел көлікті жүргізіп көргісі келгенін айтып, кінәсін мойындады. Көлік иесіне қайтарылды.
Қазақстан Қылмыстық кодексінің 200-бабы (Автокөлікті ұрлау мақсатынсыз заңсыз иемдену) бойынша қылмыстық іс қозғалды. Қазіргі уақытта тергеу амалдары жүргізіліп жатыр.
Оқи отырыңыз: