НҰР-СҰЛТАН, 11 желтоқсан – Sputnik. Бокстан әлем чемпионы Сәкен Бибосынов үйленіп жатыр.
Бұл туралы журналист Серғали Балажан өзінің әлеуметтік желідегі парақшасында жазды.
"Бокстан әлем чемпионы, Олимпиада ойындарының қола жүлдегері Сәкен Бибосынов бауырымыз шаңырақ көтеріпті, шаңырағы биік болсын. Өзі секілді мықты қазақтардың санын көбейтсін! Бүгін Шымкент жақта үлкен той!", - деп жазды ол.
Сәкен Бибосыновтың әлеуметтік желідегі парақшасының storis-інде тойдың суреттері жарияланды.
Сәкен Бибосынов қазақстандық боксшы, аса жеңіл салмақта өнер көрсетеді. Қазақстан Республикасының еңбек сіңірген спорт шебері.
2020 жылғы Олимпиада ойындарының қола жүлдегері, 2019 жылғы әлем чемпионатының қола жүлдегері.
2021 жылы Белградта өткен әлем чемпионатында алтын жүлдеге ие болды.