НҰР-СҰЛТАН, 3 желтоқсан — Sputnik. Бір күнде танымал болып кеткен сылақшы-әнші Гүлмайдан Серікбай (Дана) Asia's Got Talent халықаралық байқауына қатысады. Ұйымдастырушылар Гүлмайданмен өздері байланысып, оның кастингтен өткенін хабарлаған.
Бұл жаңалықты блогер Дәулет Мұқаев Instagram парақшасында бөлісті.
"Ақын Олжас Отар Дана орындайтын әннің сөзін жазып беретінін айтты. Ең кереметі – "Аsia's Got Talent" жобасының ұйымдастырушылары Данамен өздері байланысып, кастингтен өткенін хабарлапты. Ең қызығы – Аsia"s Got Talent шоуының ұйымдастырушылары Данамен өздері байланысып, оның кастингтен өткенін жеткізді. Енді ол халықаралық додада бақ сынап көреді!" – деп жазды ол.
Дәулет Мұқаев қазіргі уақытта Данаға сахна киімін тіктіру үшін отандық дизайнерлермен келіссөз жүргізіп жатқанын айта кетті.
Сонымен қатар Дана әнші Сәкен Майғазиевтің қолдауымен Темірбек Жүргенов атындағы Қазақ ұлттық өнер академиясындағы оқуын жалғастырады.
Еске сала кетейік, ән шырқап жатқан сылақшы қыздың видеосы Қазнетте кеңінен таралып кетті. Бойжеткенді құрбысы әрі құрылыстағы әріптесі түсіріп алған.
Asia's Got Talent – бұл Саймон Коуэлл құрған Got Talent жаһандық франшизаның бір бөлігі саналатын Азиядағы телевизиялық таланттар шоуы.