АЛМАТЫ, 11 қазан – Sputnik. Қазақстан мектептері коронавирус пандемиясына байланысты Орталық Азия, Еуропа елдеріне қарағанда қашықтан көбірек оқыған, деп хабарлайды Sputnik Қазақстан.
Ranking.kz мәліметіне сәйкес, Қазақстанда коронавирусқа байланысты шектеулер мектептерге Орталық Азия, ЕАЭО-ның басқа елдеріне, сондай-ақ, Еуропаның дамыған елдеріне қарағанда көбірек әсер етті.
Қазақстанда мектептер 11 ай және 3 аптаға жабылды, соның ішінде 2,5 ай толық жабық болса, 8 ай және 3 апта ішінара жабылды. Тиісінше, Қазақстанда қашықтан оқыту салдарынан инфрақұрылымға жүктеме басқа елдерге қарағанда айтарлықтай жоғары болды.
Мысалы, Қырғызстанда мектептердің жабылуы 6,5 айға, Ресей, Армения және Өзбекстанда шамамен 3 айға созылды. Тәжікстан, Түрікменстан немесе Беларусьта мектептер қашықтан оқытуға мүлдем көшкен жоқ, соған сәйкес мектептер де жабылмады.
Еуропа елдеріне келер болсақ, Польшада мектептер 10 ай 3 аптаға және Германияда 9,5 айға жабылды.
"Зерттеуге сәйкес, Қазақстанда инфрақұрылым, соның ішінде интернет қолжетімділігінің арқасында ұзақмерзімді қашықтан оқыту форматының сақталды", - делінген ақпаратта.
Осы жылдың бірінші жартыжылдығының қорытындысы бойынша елімізде интернет халықтың 98,3%-іне қолжетімді. Соның ішінде республикада басым бөлігі мобильді интернетті пайдаланады. Маусымның соңына қарай интернетке қолжетімділігі бар 16 миллион ұялы байланыс абоненті бар екенін белгілі болды – бұл өткен жылдың сәйкес кезеңімен салыстырғанда 6,9%-ке көп.
Айта кетері, ЮНЕСКО мәліметіне сәйкес, коронавирус пандемиясы 190-нан астам елдегі 1,6 миллиард оқушыға әсер етті. Осылайша бұл білім беру жүйесіндегі ең ауқымды іркіліс болды.
Мектептер мен басқа да білім беру орындарының жабылуы әлем бойынша оқушылар мен студенттердің 94%-іне әсер етті. Сол кезде қашықтан оқытуды қамту деңгейіне қарай елдер арасында елеулі айырмашылық байқалды: табысы жоғары елдерде қашықтан оқыту бойынша оқушылардың шамамен 80%-85% қамтылды, ал табысы төмен елдерде бұл көрсеткіш 50%-тен төмен болды.
Бақуатты емес елдерде интернеттің орнына радио және теледидар сияқты дәстүрлі әдістер қолданылған.
Ата-аналар Sputnik Қазақстан видеосында қашықтан оқу машақаты туралы айтқан болатын.