Есік-терезе сынып, шатыр құлады: әскери бөлімдегі жарылыстан бүлінген нысандар

Жарылыс шыққан жерге жақын орналасқан бірнеше ауылдың тұрғындары қауіпсіз жерге көшірілді. Қазір олар туыстарының үйін паналап отыр. Өз үйіне оралғандар да бар.

Елді мекендерді өрт сөндірушілер, полиция бақылауға алған. Қазір бүлінген бизнес нысандарда апат салдарын жою жұмыстары жүріп жатыр. Үш күн ішінде арнайы мамандар келтірілген зиян мен шығынды есептейді.

Жарылыстан кейін Жамбыл облысындағы жағдайдың қалай ретке келіп жатқанын Sputnik Қазақстан фотолентасынан көріңіз.

1 / 13

Жамбыл облысы Байзақ ауданында оқ-дәрі қоймасы жарылып, он төрт адам қайтыс болды. Жарылыс болған маңға жақын жердегі нысандар бүлінді: есік-терезелер сынып, шатыр құлады.

2 / 13

Бұған дейін қорғаныс министрлігі тұрғындарға ешқандай қауіп төніп тұрмағанын айтқанымен, адамдар қалыпты тіршілігіне орала қойған жоқ.

3 / 13

Жарылыс болған қойма мен оның жанында орналасқан Қайнар ауылына сол жерде тұратын адамдарға да кіруге рұқсат етілмейді. Ал оған жақын жерде жедел жәрдем көлігі мен полиция қызметкерлері жүр.

4 / 13

Бүлінген нысанның бірі осыдан жиырма жыл бұрын салынса, енді бірі 13-15 жылдан бері жұмыс істеп тұрған.

5 / 13

Жарылыс болған кезде осы нысандар ішінде қызметкерлер жұмыс істеп жатқан. Тіпті қонақтар да болған. Олар жарылысты ести сала жазық далаға қарай қашқан.

6 / 13

Жергілікті кәсіпкерлердің айтуынша, өрт түсте сағат үш жарым шамасында басталған. Бірден өрт сөндірушілер келіп, жұмысқа кіріскен. Алайда араға бірнеше сағат салып жарылыс болған.

7 / 13

Дәл қазір бүлінген нысандар орнында арнайы құрылған комиссия жұмыс істеп жатыр. Олар үш күннің ішінде жалпы шығынды есептеуі қажет.

8 / 13

Жамбыл облысының әкімі Бердібек Сапарбаев пен вице-премьер Роман Скляр кәсіпкерлермен кездесіп, нысандарды жөндеп беруге уәде еткен.

9 / 13

Ал кәсіпкерлер шығынды өз бетінше жобалап болсын есептемеген. "Себебі басқа адамдар жақынын жоғалтып жатқанда оны ойлауға мұрша да жоқ" дейді олар.

10 / 13

Бүлінген нысандардың орнын тазалау жұмыстары басталып кетті. Сынған, жарамсыз қалған заттар көліктерге тиеліп жатыр.

11 / 13

Кәсіпкерлердің бірінің көше бойында орналасқан мейрамхана, наубайхана, медициналық пункт, дәмхана, қонақүйі бүлінді. Қабырғалары жарылып, шатыр опырылып түскен.

12 / 13

Аймақта бұған дейін төтенше жағдай болмаған.

13 / 13

Жарылыс кезінде бүлінген қонақүйдің іші.

Есік-терезе сынып, шатыр құлады: әскери бөлімдегі жарылыстан бүлінген нысандар – фото