НҰР-СҰЛТАН, 27 шілде – Sputnik. Токио Олимпиадасында қазақстандық тхэквандошылар алғашқы жекпе-жектерін өткізді, деп хабарлайды Sputnik Қазақстан тілшісі.
Алдымен 67 салмақ дәрежесінде өнер көрсетіп жүрген Жансель Дениз ортаға шықты. Оның қарсыласы өзбекстандық Светлана Осипова болды. Бірінші раундта қазақстандық спортшы 4:0 есебімен айқын басымдықпен жеңді. Ал екінші раундта 8:1 болып ұтылды. Бірақ үшінші раундта есесін қайтарып, 5:1 есебімен жеңіске жетті. Жекпе-жектің қорытындысы – 10:9. Осылайша Жансель Дениз келесі айналымға өтті. Оның келесі қарсыласы – ұлыбратаниялық Уолкден Бьянка.
Ал Руслан Жапаров (80 келіден жоғары) Германия спортшысы Александр Бахманмен күш сынасты. Қазақстандық тхэквандошы оны 11:7 есебімен жеңіп, ширек финалға шықты. Келесі қарсыласы – жапониялық Ин Кио Дон.
Айта кетейік, қазіргі кезде Қазақстанның қоржынында үш қола медаль бар. Біреуін дзюдошы Елдос Сметов жеңіп алса, екеуін ауыр атлеттер – Игорь Сон мен Зульфия Чиншанло алып берді.