НҰР-СҰЛТАН, 20 маусым – Sputnik. Ақтөбе облысында жол апатынан екі мектеп директоры ажал құшты.
Тағы екеуі түрлі жарақатпен орталық аудандық ауруханаға жеткізілді, деп хабарлайды өңірлік "Мой город" басылымы.
Төрт директор Ойыл ауданының қасиетті жерлеріне демалуға барған. Үйге қайтарда жантүршігерлік жол апатына түсті.
Әріптестері №20 мектеп директоры Бағдат Үрімбаеваның көз жұмғанын айтты. Марқұмның артында екі қызы қалған. Сондай-ақ №33 мектеп директоры Альмира Орақова мерт болды.
Ақтөбе облысының полиция департаменті трагедияның мән-жайын хабарлады.
Анықталғандай, көлік сенбі күні кешке Қобда-Ойыл тас жолының 156 шақырымында аударылған. Жүргізуші жол қозғалысы ережесін бұзып, рөлге ие бола алмай қалған. Көлік жүргізушісі мен тағы бір жолаушы оқиға орнында жан тапсырды.
Тағы оқыңыз: Алматы облысында жантүршігерлік апаттан жеті адам көз жұмды
Қылмыстық кодекстің 345-бабы 3-тармағы бойынша (Абайсызда адам өліміне әкеп соққан, жол қозғалысы ережелерін бұзу) сотқа дейінгі тергеу басталды.