НҰР-СҰЛТАН, 25 мамыр — Sputnik. Түркістан облысының Түлкібас ауданында үшем дүниеге келді. Бұл туралы өңір басшысының баспасөз қызметі хабарлады.
37 жастағы Назипа Янгибаева №1 облыстық перинаталдық орталығында екі қыз бен бір ұл босанды. Жаңа туған нәрестелерге Әдемі, Ислам, Самира есімдері берілді.
Мерзімінен ерте туылған үшемдер перинаталдық орталық дәрігерлерінің бақылауына алынған. Бүгінде медицина қызметкерлерінің көмегімен сәбилер салмақ қосып, денсаулық жағдайы жақсаруда. Әзірге үшемдердің қашан шығатыны белгісіз.
Оқи отырыңыз: Шымкентте екі баланың анасы үшем туды
Айта кетсек, үшем дүниеге келген отбасының бір ұл мен екі қызы бар. Көпбалалы ана үй шаруасында отырған әйел. Ал отағасы көлік жүргізушісі болып жұмыс істейді.
Былтыр № 1 облыстық перинаталдық орталығында 8746 сәби дүниге келді. Жыл басынан бері 3108 нәресте туған. Оның 72 егіздер болса, екеуі үшем. Орталық дәрігерлері әр жыл сайын жүздеген шала туған нәрестенің өмірін сақтап қалады.