НҰР-СҰЛТАН, 29 сәуір – Sputnik. Ұлттық қауіпсіздік органдарының ардагері, отставкадағы генерал-майор Саят Мыңбаев қайтыс болды, деп хабарлады ұлттық қауіпсіздік комитеті.
Саят Мыңбаевтың қайтыс болуына байланысты көңіл айту хабарламасы ведомствоның ресми сайтында жарияланды.
"Ұлттық қауіпсіздік органдарының ардагері, отставкадағы генерал-майор Мыңбаев Саят Мұхаметбайұлының қайтыс болуына байланысты Қазақстан Республикасы ұлттық қауіпсіздік комитетінің басшылығы мен "ҰҚК органдарының ардагерлері" РҚБ марқұмның отбасы мен туған-туыстарының қайғысына ортақтасып көңіл айтады", – делінген хабарламада.
Ашық ақпарат көздеріндегі деректерге сүйенсек, Саят Мыңбаев ҰҚК-нің әскери қарсы барлау бөлімінің бастығы болып бұрынырақта қызмет атқарған. Ол "Қазақстан темір жолы" ұлттық компаниясы" АҚ бұрынғы басқарма төрағасы Сауат Мыңбаевтың ағасы.