НҰР-СҰЛТАН, 16 сәуір – Sputnik. Қазақстанда заң жобасын әзірлеу барысында жұртшылықтың қатысуымен ашық дебат өткізіледі. Бұл туралы әділет вице-министрі Наталья Пан мәлімдеді, деп хабарлайды Sputnik Қазақстан тілшісі.
"Бұған дейін мемлекеттік органдар заң жобасын әзірлеуге кірісу үшін тұжырымдама дайындайтын. Ол "Ашық НҚА" порталында жарияланып, халықпен талқылау өткізілетін. Жаңа модельге сәйкес, енді тұжырымдамадан бұрын консультативтік құжат әзірленеді. Жұртшылықпен талқылау тек "Ашық НҚА" порталы арқылы ғана емес, қоғамдық тыңдау және дебаттар өткізу жолымен да жүргізіледі", - деді Пан брифингте.
Айтуынша, қоғамдық тыңдаулар мен дебаттар халықтың қандай да бір салаға қатысты ой-пікірін білдіруге мүмкіндік береді.
Қоғамдық тыңдау кезінде заң жобасын әзірлеген мемлекеттік орган құжаттағы басты жаңашылдықтар туралы баяндама жасайды.
Ашық дебатқа мемлекеттік орган мен қоғам өкілдері, тіпті мақсатты топтар қатыса алады. Дебатты онлайн трансляция арқылы көрсету көзделіп отыр.
Оқи отырыңыз: Сенат сайлау және саяси партиялар туралы заңдарды қабылдады
"Қазір карантин жағдайында дебатты онлайн өткізе аламыз. Жағдайдың түзелуіне қарай бетпе-бет өткізу мүмкіндігі бар. Дебат форматын мемлекеттік орган өзі шешеді. Пікірталасқа заң жобасын қолдайтындар да, қолдамайтындар да, кем дегенде екі тарап шақырылады", - деді вице министр.
Пан әр мемлекеттік орган заң жобасы келесі инстанцияларда қолдау табуы үшін дебат өткізуге мүдделі болатынын атап өтті.
Осылайша, мемлекеттік органдар заңды консультативтік құжат дайындалып, жұртшылықпен келісу процедуралары аяқталғаннан кейін ғана әзірлейді. Мұндай тетік өкілетті органдар қабылдайтын шешімдердің ашықтығына қол жеткізуге мүмкіндік береді, деп санайды Пан.