НҰР-СҰЛТАН, 9 наурыз – Sputnik. Қарулы күштердің әскери бөлімдері кенеттен берілген дабылмен көтерілді, деп хабарлайды Қорғаныс министрлігінің баспасөз қызметі.
Өткен түнде Шымкент пен Сарыөзекте орналасқан Құрлық әскерлерінің әскери бөлімдері оқу-жаттығу дабылын қақты.
Іс-шара Қазақстан Қарулы Күштердің әскери бөлімдерінің жауынгерлік даярлығын қауырт тексеру үшін өткізілді.
"Бөлім командирлері Жамбыл облысындағы "Мәтібұлақ" жалпыәскери полигонына бағынысты бөлімшелерді жауынгерлік даярлыққа келтіруге тапсырма алды. Әскери қызметшілер әскери машиналарда белгіленген ауданға жүздеген шақырым марш жасады", - делінген хабарламада.
Ауыр шынжыр табанды бронды техника теміржол арқылы және көлік тартқыштармен тасымалданады.
Әскерлердің іс-қимыл жоспарына сәйкес, белгіленген ауданға келген кезде инженерлік құралдарын құрып, бекіністерді бүркемелеп, одан әрі оқу-жауынгерлік міндеттерді атқаруға әзірлік бойынша іс-шаралар атқарулары қажет.