НҰР-СҰЛТАН, 21 қаңтар – Sputnik. Енді қазақстандықтар жүргізуші куәлігі мен көлікті тіркеу куәлігін өзімен бірге алып жүруге міндетті емес. Жеке куәлігі қасында болса жеткілікті. Сенат көлік жүргізуге қатысты жаңашылдықтарды көздейтін заң қабылдап, президенттің қол қоюына жіберді, деп хабарлайды Sputnik Қазақстан тілшісі.
Сенаттың жалпы отырысында "Қазақстанның кейбір заңнамалық актілеріне жол жүрісі мәселелері бойынша өзгерістер мен толықтыру енгізу туралы" заң жобасы қаралды. Құжат парламенттің бір топ депутаты бастамасымен әзірленді.
Заң жобасында куәлікті өзімен бірге алып жүруді талап ететін норманы қолданыстағы заңнамадан алып тастау көзделіп отыр.
"Яғни, автокөлік иесін полиция тоқтатқан кезде, ол жеке куәлігін ұсынып, полицей сол арқылы планшеттің көмегімен оның басқа құжаттарын тексере алады", - деді сенат депутаты Нұрлан Бекназаров.
Депутаттың айтуынша, жүргізуші куәлігін үйде ұмытып кеткені үшін бұрынғыдай айыппұл салынбайды.
"Заң жобасындағы өзгерістер мен толықтырулар шетелдік жүргізушілер мен шетелдік көліктерге қолданылмайды. Яғни олар өзімен бірге барлық қажетті құжатты алып жүруге міндетті", - деді сенатор.
Сондай-ақ, заң жобасында автобустарды тіркеуге қатысты норма көзделген.
Ішкі істер министрлігінің мәліметінше, соңғы үш жылда Қазақстанда 45 950 жол апаты болған. Соның салдарынан 60 469 адам әр түрлі деңгейде жарақат алып, 6498 адам көз жұмды.
"Соңғы жылдары жол апатының саны азайғанымен, бұл өзекті мәселе болып қалып отыр оның бірнеше себебі бар. Солардың негізгісі – техникалық жағдайы талапқа сай келмейтін, ескірген көліктердің жолаушылар тасымалында қолданылуы. Мысалы, ресми мәліметтерге сәйкес бүгінгі таңда елімізде әрбір үшінші автобус (36% немесе 90 603-тің 32 959-ы) жиырма жылдан астам уақыт бойы жолаушылар тасымалдаумен айналысып келеді", - деді депутат.
Бұл көрсеткіш жол апаты санының көбейіп, азаматтардың зардап шегуіне әкелуде. Сондықтан жолаушылар тасымалдайтын автобустарды жаңарту қажеттігі туындап отыр.
Осыған байланысты сенаторлар "Жол жүрісі туралы" заңға он жылдан аса пайдаланып келген автобустарды бастапқы тіркеуден өткізуге тыйым салатын түзету енгізуді ұсынды және бұл норманы 2022 жылдың 1 қаңтарынан бастап енгізу көзделуде.
Сенат аталған заңды екі оқылымда қабылдап, президенттің қол қоюына жіберді.