НҰР-СҰЛТАН, 9 қаңтар – Sputnik. Қатты аязға байланысты елордада қала маңына қатынайтын сегіз бағдар уақытша тоқтатылды.
Бұл туралы City Transportation Systems әлеуметтік желідегі парақшасында хабарлады.
"Қатты аязға байланысты қала маңына қатынайтын №№ 305, 308, 309, 310, 312, 315, 316, 317 бағдарларының қозғалысы уақытша тоқтатылды", - делінген хабарламада.
Қала маңына қатынайтын басқа бағдарлар линияда.
Бұған дейін синоптиктер Қазақстанда 9-10 қаңтарда аяздың беті қайта бастайды деп болжаған еді.
"Қазақстанның басым бөлігіне циклон жырасы әсер етеді. Соған байланысты өңірлерде ауа температурасы көтеріледі, оңтүстік өңірлерде температура бір градустан жоғары болады. Республиканың басым бөлігінде аздаған боран соғып, қар жауады, оңтүстікте жауын-шашын болады. Кей жерде тұман, көктайғақ болып, жел күшейеді", - делінген Қазгидромет ақпаратында.