АЛМАТЫ, 28 желтоқсан – Sputnik. Қазақстандық әнші Димаш Құдайберген "Россия" телеарнасындағы "Привет, Андрей!" бағдарламасында қонақ болды. Бағдарлама алдағы "Жыл әні" фестиваліне арналды.
Ресейлік жұлдыздар оны көріп, талдады. Николай Басков пен Андрей Малахов қазылық етіп отырған адамдардың кім екенін сұрады.
"Сын айтып тұрған адам тыныс алудың, тұрудың, үн шығарудың, оның бәрін бір уақытта орындаудың не екенін білмей, әншіні қалай бағалай алады. Бұл менің циркке немесе балетке барып, акробаттарды сынаумен немесе Цискаридзе, Плисецкаяның биін сынаумен тең. Бұл мүмкін емес, бұл – шығармашылық", - деді Басков.
Осы тұста Димаш байқау туралы ойын айтты.
"Байқауға қатысқан кезде 17 жаста болдым. Басқа ән айтқым келді, бірақ қазылар алқасы менің вокалдық мүмкіндігім көрінуі үшін әннің секвенцияда болуын сұрады. Мен айтқанын орындадым. Содан кейін сол үшін сынай бастады", - деді Құдайберген.
Жүргізушімен әңгіме барысында Димаш концерттерді сағынып жүргенін айтты.
"Баршаңызға амандық-саулық тілеймін. Барлық көрерменге, көршілес Ресейге Қазақстанның атынан жалынды сәлем айтамын", - деді Димаш Құдайберген қазақ тілінде.
Айта кетейік, Димаш Құдайбергеннің "Мен сені сағынып жүрмін" әніне түсірілген жаңа бейнебаяны 23 желтоқсанда жарыққа шығарды. Музыкалық туындының әнін жазған Игорь Крутой. Бағдарлама барысында Димаш жаңа әнін орындады.