Коронавируспен күресте алдыңғы қатарда тұрған әйелдер – фото

"Біз жалғызбасты қарттарға азық-түлік беруден бастадық. 15-20 келі сөмкелер тасыдық. Кейіннен дәріханаларда кезекте тұрғандар көбейді, аспирин таба алмай жүргендер мен ауруханаға жата алмай жүргендерді кездестірдік. Соның бәрін көріп тұрған кезде тыс қалу мүмкін емес еді", - деп еске алды Саида Таукелева.

"Қарт адамға азық-түлік алып келген кезде оған дәрі де керек екенін түсінесің. Немесе бір қарт кісіге көмектесу үшін келесіз, ал көрші үйден көмек сұрап әже алдыңнан шығады. Сондай сәтте кезекті міндеттің тұрғанын көресің"- дейді Адель Оразалинова.

"Жұмысынан айырылған әйел екі кішкентай баласын қалай асырайтынын білмеген жағдай болды. Ал жалдамалы пәтердің иесі оларды қуып жіберген. Карантин кезінде түскен қоңыраулардың арасында осындай жағдайды естісеңіз, онда сіз де шетте қалмайтын едіңіз", - дейді "Реванш" әлеуметтік көмек қорының негізін қалаушы және жетекшісі Елена Билоконь.

"Азық-түлік жиынтығын алып барған кезде бірінші болып жүгіріп келген балалардың қуанышты жүзін ешқашан ұмытпаймын. Өмір бойы өндірісте жұмыс істеп, бала тәрбиелеген қарт адамдар сол қиын күндерде мүлдем бейтаныс адамдардан көмек алды. Біз апарған қарапайым заттарды үй сыйлағандай қабыл алды", - деп еске алды Алмагүл Жайылханова. Карантиннің алғашқы күнінен бастап ол Алматы қаласының жедел еріктілер штабында жұмыс істеді.

"Қызыл" аймақта наурыздан бастап жұмыс істеймін. Мені "батыр" деп атаған кезде таңғаламын. Иә, біздің арамызда қорқып кетіп қалғандар болды. Алайда мен үшін кетіп қалу дәрігердің ақ халатын сатумен тең", – деді инфекционист және вирусолог дәрігер Қарлығаш Әбдиева.

"Ауыр жағдай көп болды. Соның ішінде коронавирус инфекциясымен өкпенің 72 пайызы зақымданған жүкті науқастың жағдайы ауыр болды. Ол ұзақ уақыт реанимация бөлімінде жатты. Бірнеше консилиум өткіздік. Содан кейін әйел сауығып, баласымен бірге перзентханадан үйге шығарылды", - деді акушер-гинеколог, Алматы қаласының №1 қалалық клиникалық ауруханасының бөлім меңгерушісі Әдемі Жидебаева.

"Пандемия кезінде қыз босандым. Бұл өте қорқынышты болды. Менің екі ұлым бар – бес және екі жаста, сондықтан салыстыруға болатын нәрсе бар. Жүктілік кезіндегі ультрадыбыстық зерттеуден бастап, жаңа туған нәрестені жоспарлы тексеруге дейін – бәрі үлкен проблема болды, күйзеліс болды. Бұл инфекцияны жұқтырып алудан үнемі қорқып жүрдім. Сондықтан пандемия кезінде босанған әйелдерді нағыз батырлар деп атауға болады", - деді декреттегі үш баланың анасы Гүлназ Ақбаева.

"Бұрын бізге келіп түскен өтініштің 80 пайызы сексуалдық зорлық-зомбылықпен байланысты болса, карантин кезінде 80 пайызы – тұрмыстық зорлық-зомбылық туралы болды. Күйеуі қол көтереді, экономикалық жағынан қысым көрсетеді, психологиялық тұрғыдан мазақ қылады, діни негізде әйелінің ізіне түседі. Бірде күйеуі әйелін хиджаб киюге үгіттеген жағдай болды. Бірақ соңында әйелдің шашын тақырлап алып тастайды. "Енді орамалсыз далаға шықпайтын боласың" деп айтқан", - деді НеМолчи.kz қоғамдық қорының негізін қалаушы Дина Таңсәрі.

"70-ке жуық көпбалалы ана, жалғыз басты, мүгедек кісі менің "Сенімді тыл" чатыма қосылды. Олар дәрігерлерге тамақ беру жағын ұйымдастырды. Мен оларға: "Қыздар, біздің дәрігерлер қазір қандай тозақта өмір сүріп жатқанын елестетіп көріңіздерші. Олар бірнеше күн бойы коронавируспен ауыратын науқастарды қабылдайды, туыстарын көрмейді және тіпті үйдегі қалыпты тамақты жей алмайды!"- дедім деп Әсел Қаниязова қиын күндерді еске алды. Ол II топтағы мүгедек, кәмелетке толмаған екі баланың анасы.

"Алматының айналасында блок бекет қойылды, ал қалада жұмыс істеген ауыл тұрғындары табыс көзінен айырылды. Көрші ауылда бізден жиырма минуттық жерде бір түн ішінде 12 үй тоналды. Мен қорқып кеттім, адамдар аштықтан бәріне баруға дайын екенін түсіндім. Сол кезде біз шұғыл түрде Алматыда көмек көрсете алатындарды іздей бастадық. Азық-түлік немесе ақша қажет болды. Маған қандай да бір көлемде ақша жіберді, мен мұқтаж жандарға тамақ алып, оларға видеоесеп жібердім"- деп еске алады Екатерина Ли. Ол мамандығы бойынша – журналист, өзі волонтерлікпен айналысады.