АЛМАТЫ, 7 қыркүйек — Sputnik. Білім және ғылым министрлігі студенттердің шағымы бойынша "Астана" университетіне қатысты жоспардан тыс тексеруді бастады. Жетінші қыркүйекте жоғары оқу орнына сарапшылар комиссиясы студенттер және журналистермен бірге барды, деп хабарлайды Sputnik Қазақстан.
Министрліктің білім және ғылым саласындағы бақылау комитеті төрағасының орынбасары Ғалымжан Жұмашевтың айтуынша, тамыздың соңында "Астана" университетінің 14 студенті мен түлектерінен өтініш келіп түсті. Шағымда негізгі үш мәселе көрсетілген.
"Ең алдымен, олар университетте оқытушының жоқ екенін, соған байланысты кей студенттің дипломдық тақырыпты бекіте алмайтынын айтса, енді бірі тақырыпты бекітіп қойған, алайда ғылыми жетекшімен жұмыс істей алмай жүр", - деді Жұмашев.
Студенттер оқу жылының басында өздеріне ғылыми жетекшінің тағайындалғанын, содан кейін ол жетекшінің жұмыстан шығып кеткенін айтты. Ал ол оқытушының орнына ешкім келмеген.
Екінші мәселе - қазіргі жағдайға байланысты кей студент басқа университетке ауысқысы келеді, алайда олар құжатын ала алмай жүр.
"Алайда "Астана" университетінің әкімшілігі құжаттарын беруден бас тартқан. Салдарынан студенттер жағдайдың құрбаны болып отыр: басқа оқу орнына ауыса да алмайды, оқи да алмайды", - деп түсіндірді Жұмашев.
Сонымен қатар университетті бітірген кей студент әлі күнге дейін дипломын алмаған. Студенттер білім министрлігіне жүгінгеннен кейін жоспардан тыс тексеру басталды. Алты адамнан тұратын сараптамалық комиссия оқу орнын тексеруге барды.
"Студенттерге хабарласып, қалада жүрген студенттермен бірге оқу орнына бардық. Олар университет өкілдерімен сөйлесті, алайда өз сұрағына жауап ала алмады. Біз оған куә болдық", - деді білім және ғылым саласындағы бақылау комитетінің басшысы.
Тексеріс кезінде университеттің ректоры Назымгүл Жанғарашева және университет проректорлары орнында болмай шықты.
"Бізге ректордың Алматыға біліктілікті арттыруға кеткенін, ректордың орнына атқарушы болып ешкім тағайындалмағанын, проректорлардың да жоқ екенін хабарлады. Оның бірі ауырып қалса, енді бірі жұмысқа шыққысы келмеген", - деп атап өтті Жұмашев.
Білім министрлігі өкілдері мен студенттерге университтеттің заңгерімен сөйлесті, ол өтінішпен танысты, бірақ тексеру актісіне қол қоюдан бас тартты. Комиссия университетте жұмыс күнінің соңына дейін болады.
Жұмашевтың айтуынша, егер жоғары оқу орны өтініш бойынша құжаттарды ұсынбаса, онда Әкімшілік құқық бұзушылық кодексінің 462-бабына сәйкес "мемлекеттік инспекциялар мен мемлекеттік бақылау және қадағалау органдарының лауазымды адамдарына өздерінің қызметтік міндеттерін орындауына кедергі келтіру, қаулыларды, нұсқамаларды және өзге де талаптарды орындамау" әкімшілік хаттама толтырылады.
"Барлық құжатты тексереміз, егер қандай да бір бұзушылық анықталса, онда хаттама толтырылады, ЖОО-ға айыппұл салынады. Сонымен қатар университет лицензиясынан уақытша айырылады, оның мерзімі бір айдан алты айға дейін созылады. Егер бұзушылықтар жойылмаса, онда ЖОО-ның қызметі тоқтатылады", - деп қорытындылады Жұмашев.
Айта кетейік, министрлік пен "Астана" университеті арасындағы сот талқылаулары бірнеше жылдан бері тоқтамай келеді.
2018 жылы жоспарлы тексерулер кезінде университет кедергі келтірген болатын. Білім министрлігі хаттама толтырды, сот университетке 100 АЕК айыппұл салды.
2020 жылы ақпанда кезекті жоспарлы тексеру кезінде қайтадан сол мәселелерге тап болды.
"Біз хаттама толтырып, сотқа жібердік және жеңіп шықтық. Университетке тағы да айыппұл салынды, олар қарсы талап қойды. Сот пен карантиннің салдарынан сәуірде тексеру қайта басталмай қалды", - деп түсіндірді ведомство өкілі.
Министрлік сот талқылауларын жеңіп шықты және қыркүйектің соңында жоспарлы түрде тексеріс өткізбек болды. Алайда студенттерден өтініш ертерек келіп түсті, сондықтан жоспардан тыс тексеру өткізу туралы шешім қабылданды.