АЛМАТЫ, 12 тамыз – Sputnik. Атырау облысында тоғызыншы тамызда төбелес кезінде танымал атыраулық спортшы, грепплингтен Азия чемпионы Есенбек Сиғуатов көз жұмды. Кісі өліміне қатысты күдікті уақытша ұстау изоляторына қамалды, деп хабарлады өңірлік "Мой город" басылымы.
Атырау облысы полиция департаментінің хабарлауынша, 9 тамызда сағат 3.10-да Дамба ауылының екі тұрғыны арасында қақтығыс туған.
"Жанжал барысында бір адамға оқ тиген. Содан кейін ол ауруханаға жеткізілді. Алған жарақатынан ер адам көз жұмды", - делінген полиция ақпаратында.
Полиция қызметкерлері күдіктіні ұстады. Ол уақытша ұстау изоляторына қамалды. Тиісті сараптамалар тағайындалды.
Аталған факті бойынша Қылмыстық кодекстің 99-бабы "адам өлтіру" бойынша сотқа дейінгі тергеу амалдары жүргізіліп жатыр.
Оқи отырыңыз: Атырау басшысы әкімдіктің алдында болған келеңсіз оқиға үшін кешірім сұрады
Айта кетейік, қайғылы оқиға тоғызыншы тамызда Дамба мен Құрманғазы ауылының жігіттері арасындағы төбелес кезінде болды. Оқ чемпионның жүрегіне тиген. Есенбек Сиғуатов бір апта бұрын 18-ге толған еді.