НҰР-СҰЛТАН, 8 тамыз – Sputnik. Осыдан екі апта бұрын Түркістан облысының Отырар ауданында іс-түссіз жоғалып кеткен бойжеткен Алматыдағы базарлардың бірінен табылды, деп хабарлады "Астана" арнасы.
Оқи отырыңыз: Түркияда қазақ қызы жұмбақ жағдайда жоғалып кетті
19 жастағы Ұлпан Әсен аман-есен, қазір үйіне жеткізілді. Туыстары студент қыз ешкімге ештеңе айтпастан Алматыға өз бетімен кетіп қалыпты деді. Оны балмұздақ сатып жүрген жерінен тауып алғандарын айтты.
"23-і күні Ұлпан қарындасымды жоғалтып алған едім. Сол қарындасымды таптым. "Алтын Ордада", "Барлық" базарында құймалы балмұздақ сатушы болып істейді екен", - дейді туған ағасы Айдар Жақыпбеков.
Ағасының айтуынша, Ұлпан мұның алдында өз бетінше жұмыс істеп, ақша тапқысы келгенін білдірген. Алайда, жас қыздың жұмысқа шығуына үйдегілер қарсылық танытыпты. Сөйтіп, Ұлпан Алматыға қашып кеткен.
Айта кетейік, оны Түркістан мен Алматы полициясы және еріктілер екі апта бойы іздеген болатын.