Өңірлер

Түркістан облысында селден зардап шеккендерге 300-ден астам үй салына бастады

Қазақстанның вице-премьері Роман Скляр Мақтаарал және Төле би аудандарындағы қалпына келтіру жұмыстарын тексерді
Sputnik

АЛМАТЫ, 19 мамыр – Sputnik. Түркістан облысында су тасқынынан қирап, зақымданған үйлерді қалпына келтіру және салу жұмыстары басталды.

Премьер-министрдің орынбасары Роман Скляр тұрғын үйлерді, әлеуметтік маңызы бар нысандарды қалпына келтіру жұмыстарының барысын тексерді, деп хабарлады үкіметтің баспасөз қызметі.

Түркістан облысында селден зардап шеккендерге 300-ден астам үй салына бастады

Роман Скляр мен Түркістан облысының әкімі Өмірзақ Шөкеев төтенше жағдай салдарын жою жұмыстарымен танысып, Төле би ауданының ауыл тұрғындарымен кездесу өткізді. Сондай-ақ, Мақтарал ауданының су басқан аумақтарын аралады.

Мырзакент кентіндегі жеке үй құрылысына 70 гектар жер телімі бөлінген жаңа шағын ауданның құрылыс жұмыстарын тексерді. Үкімет резервінен тұрғын үй салу, инженерлік-инфрақұрылымдық шығындарға, су құбыры желілерін қайта жаңарту және қалпына келтіру, көлік инфрақұрылымын қалпына келтіру үшін қаражат бөлінген.

Түркістан облысында селден зардап шеккендерге 300-ден астам үй салына бастады

Жаңа шағын ауданның құрылысында 32 мердігер ұйым жұмыс істеп жатыр, 313 үйдің құрылысы басталды. Құрылыс алаңында 900-ге жуық құрылысшы мен 70 арнайы техника жұмыс істеп жатыр.

Роман Скляр қираған үйлерді, көлікжәне инженерлік инфрақұрылым нысандарын қалпына келтіру, су басқан аумақтардан суды сору жұмыстарының қарқынын төмендетпеуді тапсырды. 

Түркістан облысында селден зардап шеккендерге 300-ден астам үй салына бастады

Еске сала кетсек, бірінші мамырда Өзбекстанның Сырдария облысында Сардоба су қоймасының бөгеті жарылып, алты адам қаза болды.

Қазақстанның оңтүстігінде бірнеше ауыл зардап шекті. 1030 үй мен мектеп, балабақша, медициналық объектілерді су басты. Елді мекендерден 31 мыңнан астам адам көшірілді. Түркістан облысында техногендік сипаттағы төтенше жағдай режимі жарияланды. Қазіргі уақытта барлық үйден су сорылды.

Сонымен қатар мамырда жаңбыр жауып, Түркістан облысының Төле би ауданында су тасқыны болды. Ауданда алты елді мекенде 250 тұрғын үй ауласын, 76 үйді су басты.