НҰР-СҰЛТАН, 18 мамыр — Sputnik. Шығыс Қазақстанда төрт бала ауруханада көз жұмды. Бәрі - Аягөздегі балаларға арнайы әлеуметтік қызмет көрсету интернатының тәрбиеленушілері. Мекеме психоневрологиялық патологиясы бар балаларға арналған.
Аягөздегі арнайы интернаттағы оннан астам бала қызылша диагнозымен ауруханаға түсті. Кейбірінде ішек инфекциясы да анықталды, деп хабарлайды "Еуразия" бірінші арнасы".
"Бұған дейін интернатта балалар қызылшадан ғана емес, ағзаның әлсіреуінен де көз жұму мүмкін деген ақпарат шыққан. Алайда облыстың бас педиатры бұл мәліметті жоққа шығарды", - деп хабарлайды телеарна.
"Асқынған коморбидті фон, туа біткен патология, кахексия өлімге себеп болды. Облыстық ведомствоаралық комиссия жұмысы барысында орталықтағы барлық балаларды тексердім. Олар медициналық және әлеуметтік қызметті толық көлемде алып жатыр. Тәулік бойы мекеме қызметкерлерінің бақылауында", - деді облыстың бас педиатры Шолпан Мақашева.
Облыстың жұмыспен қамту және әлеуметтік бағдарламалар басқармасының жетекшісі Жасұлан Сәрсебаев балаларды коронавирустан қорғау үшін мекемеде карантин режимі енгізілгенін айтты. Бұған дейін балалар мен мекеме қызметкерлері Covid-19-ға сынама тапсырды. Нәтижесі теріс болып шықты.
Инфекция жайлы білген кейбір ата-аналар балаларын өзге мекемеге ауыстырды. Аналардың бірі әлеуметтік желі арқылы Даниал Ахметовтан көмек сұрады.