НҰР-СҰЛТАН, 15 наурыз- Sputnik. Өзбекстанда коронавирус жұқтырудың алғашқы дерегі тіркелді, деп хабарлайды Sputnik Өзбекстан.
Бұл туралы Өзбекстанның санитарлық-эпидемиологиялық агенттігі хабарлады.
Франциядан жақында келген азаматтан коронавируске анализ алынған, оның нәтижесі тұрғынның дертке шалдыққанын көрсетті.
"Он бесінші наурызда сағат 6.00-де вирусология институтының зертханасында жүргізілген зерттеу нәтижесінде Франциядан келген азаматтан коронавирус анықталды", - делінген хабарламада.
Қазір Өзбекстан билігі коронавирустың таралуына жол бермеу үшін барлық қажетті алдын алу шараларын жүргізіп жатыр, дейді агенттіктегілер.
Әлемдегі эпидемиологиялық жағдай
Әлемде 152 елде 156 494 коронавирус жағдайы тіркелген, оның ішінде ҚХР-да 80 884 жағдай (күн сайынғы өсім – 0,02%), 3 199 адам қайтыс болды. 66 911 адам дерттен сауыққан (82,7%). Стационарларда 10 734 науқас қалып отыр.
Әлемнің басқа елдерінде – 75 650 (круиз лайнерін қоса алғанда) оқиға (күн сайынғы өсім – 17,2%), оның ішінде 2 623 адам көз жұмған.