НҰР-СҰЛТАН, 29 қаңтар – Sputnik. Атырау облысы бойынша мемлекеттік кірістер департаментінің басшысы сыбайлас жемқорлық жасады деген күдікке ілінді, деп хабарлайды ҚР Сыбайлас жемқорлыққа қарсы іс-қимыл агенттігінің баспасөз қызметі.
Баспасөз қызметінің хабарлауынша, Атырау облысы бойынша мемлекеттік кірістер департаментінің басшысына қатысты сотқа дейінгі тергеу басталды.
"Ол жүйелі түрде пара алды деген күдікке ілінді, бірінші жағдайда – өзіне бағынышты тұлғадан оны қызметте көтермелеу және жалпы қамқорлығы үшін талап еткен 10 мың АҚШ долларының 3 мыңын, екінші жағдайда – жеке кәсіпкерден оның кәсібін тексеріссіз жабуға жәрдемдескені үшін 490 мың теңге пара алған", - деп хабарлады агенттік.
Күдіктіге қатысты қамауға алу түріндегі бұлтартпау шарасы қолданылды.
Оның кінәсінің дәрежесі туралы түпкілікті шешімді сот қабылдайды.