НҰР-СҰЛТАН, 17 қараша — Sputnik. Елордада әйелдер Family village тұрғын үй кешеніне бара жатқан қоғамдық көліктің жолына тұрып алды.
Желіде әйелдердің №47 автобустың қозғалысына кедергі жасап тұрған видео тарады.
"Сендерден бұрын кім өтті, ол неге бізді алмады? Енді сен де тұрасың. Оқушыларды түсіріп кетті, сұмдық",- дейді әйелдердің бірі автобус жүргізушісіне.
Диалогта боғауыз сөз қолданылады. Видео JEXEN NEWS Telegram каналында жарияланған.
"Астана LRT" көлік компаниясы болған оқиғаны түсіндірді.
"13 қараша күні сағат 07:50 шамасында №47 бағытта жүретін автобус бұзылып қалды. Одан кейін келе жатқан осы бағыттағы автобусты адамдар тоқтатып, бұған дейінгі автобустың соңғы аялдамаға неге бармағанын түсіндіруді талап етті", - деді Sputnik Қазақстан тілшісіне компаниядағылар.
Тағы оқыңыз: "Бәрі шошып кетті": автобус жүргізушісі аялдамада болған сұмдық туралы айтты
№47 автобус жүргізушісіне аялдама қарастырылмаған жерде тоқтап, адамдарды кіргізуге тура келген.
"Жүргізуші боғауыз сөзсіз жауап беруі тиіс болатын. Бұл әрекеті үшін ол көлік мамандарының біліктілігін арттыру орталығына жіберілді. Қайта оқытудан өтеді", - деді компанияның баспасөз қызметі.