НҰР-СҰЛТАН, 28 қыркүйек – Sputnik. Сарапшылар зейнетақы жинағының бір бөлігін мерзімінен бұрын алғысы келетіндерге қандай талаптар қойылуы мүмкін екенін айтты.
Нұр-Сұлтан тұрғыны Алла Сердінбаева 55 жаста. Зейнетақы қорына 1998 жылдан бері ақша салып келеді. 100 мың теңгеден сәл көп жалақы алатын ол, 4 миллион теңгедей жинап үлгерген, деп хабарлады Еуразия бірінші арнасы.
Президент Қасым-Жомарт Тоқаевтың үкіметке жылжымайтын мүлік немесе білім алуға зейнетақы жинағын мерзімінен бұрын шешу туралы мәселені қарауды тапсырғаннан кейін елорда тұрғынының болашаққа жоспары өзгерген.
Тағы оқыңыз: Сапарбаев зейнетақы неге бірден толық көлемде берілмейтінін түсіндірді
"Президенттің ұсынысына дейін қызым: "анашым, пәтер сатып ал, ол сені қартайғанда бағады" деп еді. Менің мынадай жалақыма ипотека алуға қорықтым, оның үстіне құрылыс компанияларына сенім аз. Сондықтан жинақталған зейнетақымның бір бөлігін берсе жақсы болар еді; маған ғана емес, баспанаға мұқтаж адамдардың барлығына қажет қой", - дейді Алла Сердінбаева.
Болжамдардың бірі бойынша ақшаның бір бөлігін алу үшін шотта кем дегенде 5 миллион теңге болу керек. Елімізде мұндай 285 мың адам бар. Бұл жалпы салымшылардың шамамен 3%-і екен.
"Біздің болжам бойынша, үкімет баспана, білім немесе медициналық қызмет алуға зейнетақы жинағының 30%-ке жуығын шешуге рұқсат береді. Егер адамның шотында 5 миллион теңге болса, оның 30 проценті – 1,5 миллион теңге. Бұл сома, ең болмағанда, бастапқы жарнаға жетеді", - дейді ҚР Тұңғыш президенті қоры жанындағы әлемдік экономика және саясат институтының сарапшысы Әділ Құсманов.
Алла Сердінбаева бұл санатқа жатпайтын секілді. Үкімет жыл соңына қарай зейнетақы жинақтарын мерзімінен бұрын алу тетігін әзірлеген кезде бәрі түсінікті болады.
Қазір бірыңғай жинақтаушы зейнетақы қорында 10 триллион теңгеге тарта ақша бар.