НҰР-СҰЛТАН, 10 қыркүйек — Sputnik. Қазақстан құрамасы Еуро-2020 іріктеу кезеңі аясында Калининградта Ресей құрамасына қарсы ойнады. Кездесу 1:0 есебімен ресейліктердің пайдасына шешілді.
Бірінші таймда алаң иелері басымдыққа ие болғанымен, Қазақстан құрамасы бар күшімен қорғаныста жатты. Ойынның бірінші жартысының нәтижесі – 0:0. Екінші таймда ресейліктер біраз қысым көрсетті: ойыншыларды кезек-кезек айырбастап, алыстан соққы жасай бастаған, деп хабарлайды Қазақстан футбол федерациясының ресми сайты.
Тағы оқыңыз: Калининградта жанкүйерлер Қазақстан құрамасына тосынсый жасады - видео
Ресейліктер 89-шы минутта ақыры гол соқты. Допты қақпаға дәл түсірген – қорғаушы Марио Фернандес. Есеп - 1:0.
Сонымен, I тобында алты ойыннан кейін Белгия құрамасы 18 ұпай жинап, көш бастап тұр. Екінші орында Ресей командасы келеді (15 ұпай), үшінші орын қазақстандықтарға тиесілі (7 ұпай), төртінші орында – Кипр (7). Шотландия құрамасы (6) бесінші орында, топта ең соңғы орынды иеленген – Сан-Марино (0) командасы.