НҰР-СҰЛТАН, 24 шілде — Sputnik. Ақмола полицейлері"Охотзоопром" инспекторларына шабуылдады күдікпен екі адамды ұстады, деп хабарлады өңірлік полиция департаменті.
"45 жастағы күдікті мен оның 20 жастағы ұлы Арқалық тұрғыны екені анықталды. Олар полициядан жасырына жүріп, автокөліктен құтылмақшы болған. Дегенмен, ақмолалық жедел қызметкерлердің жұмыла әрекет етуінің арқасында олар Қостанай облысының аумағында ұсталды", - деп жазылған Ақмола облысы полиция департаментінің хабарламасында.
Бұған дейін Ақмола облысында инспекторларға жасалған шабуылды тергеу барысын ішкі істер министрі ерекше бақылауға алғаны айтылған болатын.
Тағы оқыңыз: Мемлекет басшысы қорықшыны өлтіргендер ұсталып, сотқа тартылатынын айтты
Министр Ерлан Тұрғымбаев қылмысты тергеу үшін өңірге криминалдық полиция департаменті бастығының орынбасары жетекшілік ететін Ішкі істер министрлігі орталық аппаратының бір топ қызметкерін жіберді.
Браконьерлер қорықшыларға шабуылдады
Сейсенбіде Ақмола облысында "Охотзоопромның" төрт қызметкері Бірсуат ауылында екі жол талғамайтын көлікпен киіктерді күзету шарасын өткізген. Рейд кезінде ақбөкеннің ауланғаны анықталып, қорықшылар браконьерлердің соңына түседі. Нива" көлігінен оқ атылып, салдарынан екі инспектор жарақат алған. Инспекторлардың бірі кеудесінен оқ жарақатын алып, дәрігерлер келгенше жан тапсырды. 1975 жылы туған екінші инспектор кеудесі мен иығынан жарақат алған.
Қаза болған қорықшы марапатталады
Қазақстан президенті Қасым-Жомарт Тоқаев артында төрт баласы қалған қорықшы Қаныш Нұртазиновтың отбасына көңіл айтып, марқұм марапатқа ұсынылатынын хабарлады. Сондай-ақ мемлекет басшысы киіктерді атқаны үшін жазаны күшейту қажет екенін мәлімдеді.
Қарағанды облысындағы қорықшы өлімі
Дәл осындай оқиға биыл қаңтар айында Қарағанды облысында болған еді. Браконьерлер "Охотзоопром" инспекторларына оқ жаудырған.
Оқиға салдарынан ауыр жарақат алған қорықшылардың бірі Ерлан Нұрғалиев ауруханада көз жұмды.