Назарбаев пен Тоқаевты ұлықтау рәсімдері: Қазақстандағы инаугурациялар тарихы - фото

Қазақстан тарихындағы алғашқы ұлықтау рәсімі 1991 жылдың 10 желтоқсанында Алматыдағы Республика сарайында өтті. Ол кезде Нұрсұлтан Назарбаев сайлаушылардың 98,7% қолдауына ие болған еді.

Екінші ұлықтау рәсімі Астананың (қазіргі Нұр-Сұлтан) Конгресс Холлында (қазір "Астана" концерт залы) 1999 жылы 21 қаңтарда өтті. 1999 жылдың 10 қаңтарында өткен сайлауда Елбасы Нұрсұлтан Назарбаев сайлаушылардың 80% дауысын жинаған болатын.

Үшінші ұлықтау рәсімі 2006 жылдың 11 қаңтарында Ақорда сарайында болды. 2005 жылдың 4 желтоқсанында өткен президент сайлауында Нұрсұлтан Назарбаевқа сайлаушылардың 91,15%-і дауыс берді.

Қазақстандағы төртінші ұлықтау рәсімі 2011 жылдың 8 сәуірінде Тәуелсіздік сарайында өтті. 2011 жылдың 3 сәуіріндегі президент сайлауында Елбасы Нұрсұлтан Назарбаев сайлаушылардың 95,55% дауысына ие болды.

Қазақстан президенті халыққа ант берген соң қызметіне ресми түрде кіріседі. Суретте: Нұрсұлтан Назарбаевтың ант беріп тұрған сәті, 2011 жылдың 8 сәуірі.

Президент антының мәтіні: " Қазақстан халқына адал қызмет етуге, Қазақстан Республикасының Конституциясы мен заңдарын қатаң сақтауға, азаматтардың құқықтары мен бостандықтарына кепiлдiк беруге, Қазақстан республикасы президентiнiң өзiме жүктелген мәртебелi мiндетiн адал атқаруға салтанатты түрде ант етемiн". Суретте: Қазақстанның тұңғыш президенті Нұрсұлтан Назарбаевты ұлықтау рәсімі, 2011 жылдың 8 сәуірі.

Ұлықтау рәсіміне парламент депутаттары, Конституциялық кеңес мүшелері, Жоғарғы сот судьялары қатысады. Орталық сайлау комиссиясының төрағасы мемлекет басшысына президент куәлігі мен төсбелгісін, сондай-ақ байрағы мен "Алтын Қыран" орденін табыстайды. Суретте: Нұрсұлтан Назарбаевтың президент куәлігін алған сәті, 2011 жылдың 8 сәуірі.

Қазақстандағы бесінші ұлықтау рәсімі елордада 2015 жылдың 29 сәуірінде болды. Суретте: Нұрсұлтан Назарбаевтың ант беріп, президент қызметіне ресми кіріскен сәті.

1990 жылдың 24 сәуірінде қызметіне кіріскен соң 2019 жылдың 20 наурызына дейін Нұрсұлтан Назарбаев Қазақстанның мемлекет басшысы болып келді. 2019 жылдың 19 наурызында сағат 19:00-де Елбасы өз еркімен өкілеттігін тоқтататынын мәлімдеді. Оның орнына парламент сенатының төрағасы Қасым-Жомарт Тоқаев Қазақстан президенті болды. Суретте: Нұрсұлтан Назарбаевты ұлықтау рәсімі, 2015 жылдың 29 сәуірі.

Қазақстанның екінші президенті Қасым-Жомарт Тоқаев болды. Ол 2019 жылдың 20 наурызында Қазақстанның тұңғыш президенті, Елбасы Нұрсұлтан Назарбаев отставкаға кеткен соң алғаш рет мемлекет басшысы қызметіне келді. Суретте: Қазақстанның уақытша президенті Қасым-Жомарт Тоқаев, Қазақстанның өз еркімен отставкаға кеткен президенті Нұрсұлтан Назарбаев пен парламент мәжілісінің төрағасы Нұрлан Нығматулин ұлықтау рәсімінде қошемет көрсетіп тұр, 2019 жылдың 20 наурызы.

Тәуелсіз Қазақстан тарихындағы қос президент Нұрсұлтан Назарбаев пен Қасым-Жомарт Тоқаев.

Қасым-Жомарт Тоқаев – үш айда екі ұлықтау рәсімін басынан кешкен президент. Президент сайлауынан кейінгі ұлықтау рәсімі 2019 жылдың 12 маусымында болды. Суретте: Қазақстанның жаңадан сайланған президенті Қасым-Жомарт Тоқаевты ұлықтау рәсімі, 2019 жылдың 12 маусымы.

Қасым-Жомарт Тоқаев президент сайлауында дауыс берушілердің 70,96% қолдауына ие болды.

Қазақстан тарихындағы екінші президент Қасым-Жомарт Тоқаевты ұлықтау рәсіміне Елбасы Нұрсұлтан Назарбаев қатысты.