Тоқаевтың президент лауазымындағы алғашқы ресми сапары - айшықты сәттер

Қазақстан президенті Қасым-Жомарт Тоқаев ресми сапармен Ресейге барды. "Внуково-2" әуежайындағы қарсы алу рәсімі.

Жоғары мәртебелі мейманды құрмет қарауылы қарсы алды. Екі елдің әнұраны орындалды.

Қазақстан президентінің ресми делегациясын Ресейдің сыртқы істер министрінің орынбасары Александр Панкин, РФ СІМ мемлекеттік хаттама департаментінің басшысы Игорь Богдашев пен Қазақстанның Ресейдегі елшісі Иманғали Тасмағамбетов ұшақтан қарсы алды. Қазақстандағы Ресей елшісі Алексей Бородавкин де қарсы алушы делегация құрамында болды.

Мемлекет басшыларының Кремльдегі келіссөздері шағын және кеңейтілген құрамда өтті.

Президенттер саяси, сауда-экономикалық және мәдени-гуманитарлық саладағы екіжақты ынтымақтастық мәселелерін талқылады. Сондай-ақ аймақ пен әлемдегі өзекті мәселелер қозғалды.

Ресей президенті Владимир Путин Қасым-Жомарт Тоқаевты жаңа қызметке тағайындалуымен құттықтады. "Сізді Ресейде қарсы алғаныма қуаныштымын. Біз бұрыннан жақсы таныспыз. Дегенмен мемлекет басшысы ретінде алғаш рет келіп отырсыз. Сізді жоғары лауазымды қызметке кірісуіңізбен құттықтаймын! Арадағы байланыстың қандай деңгейде екенін жақсы білесіз. Әрине, оның бәрі Тұңғыш президенттеріңіздің арқасы. Екіжақты қарым-қатынас және халықаралық ұйымдар аясында зор жетістіктерге жетіп келеміз. Бұл кездесу де осыған септігін тигізуі тиіс", - деді Ресей президенті.

Қасым-Жомарт Тоқаев аз уақыт ішінде Мәскеуге сапарын ұйымдастыруға қолдау көрсеткен ресейлік тарапқа алғысын білдіріп, Путинге Қазақстанның тұңғыш президенті Нұрсұлтан Назарбаевтың сәлемін жеткізді.

"Нұрсұлтан Әбішұлына да менен сәлем айтыңыз", - деді Путин. "Қуана айтатын боламын", - деп жауап берді Тоқаев.

Сапар барысында екіжақты құжаттарға қол қойылды. Кездесу соңында екі ел президенті бірлескен мәлімдеме жасады.

Владимир Путин Қасым-Жомарт Тоқаевпен келіссөздер Нұрсұлтан Назарбаев президент болған кезде қалыптасқан дәстүрге сай өткенін айтты. Путин ресми сапарын Ресейден бастағаны үшін Тоқаевқа алғыс білдірді.

Қазақстан президенті : "Мен Ресей-Қазақстан ынтымақтастығының алтын ғасырында президент лауазымына кірістім. Менің алғашқы ресми сапарымның терең символдық мәні бар, ол біздің елдеріміздің қарым-қатынасы ерекше мәртебеге ие екенін білдіреді", - деп атап өтті.

Кремльдегі екіжақты келіссөздер қорытындысы бойынша Қазақстан және Ресей президенттері баспасөз мәслихатын өткізді. Мемлекет басшылары қазақ және орыс тілінде бірлескен мәлімдеме жасады.

Қасым-Жомарт Тоқаев: "Бұл менің Қазақстан президенті ретіндегі алғашқы ресми сапарым. Сондықтан оның мән-маңызы зор. Бұл сапар достық, ынтамақтастықты нығайтуға арналған. Өздеріңіз білесіздер, Нұрсұлтан Назарбаев жақында өз өкілеттігін тоқтату туралы шешім қабылдады. Бұл Қазақстанның болашағы үшін жасалған қадам. Сондықтан оның бұл шешімін шетелдік әріптестері жақсы қабылдады. Мен біздің мемлекеттеріміз арасындағы байланысты нығайту бойынша бағытты ұстана беремін", - деді.

Келіссөздер барысында президенттер экономикадан бастап студент алмасуға дейін талқылап, мемлекетаралық әріптестіктің түрлі саласын қамтыды. Мәскеуде қазақстандық мәдени-іскерлік орталық іске қосылатын болды.

Қасым-Жомарт Тоқаев пен Владимир Путиннің келесі кездесуі 29 мамыр күніне жоспарланып отыр. Қазақстан астанасында Жоғары еуразиялық экономикалық кеңес отырысы өтпек.