АСТАНА, 12 ақпан – Sputnik. Ғабит Байжанов Қазақстан Республикасы "Сырбар" сыртқы барлау қызметінің директоры қызметіне тағайындалды, деп хабарлады Ақорданың баспасөз қызметі.
"Ғабит Жақыпбайұлы Байжанов Қазақстан Республикасы "Сырбар" сыртқы барлау қызметінің директоры болып тағайындалсын, ол Қазақстан Республикасы президентінің көмекшісі – Қауіпсіздік кеңесінің хатшысы қызметінен босатылсын", - деп жазылған хабарламада.
Ғабит Байжанов 1963 жылы дүниеге келген. ҚР Ұлттық қауіпсіздік комитеті "Барлау" қызметі директорының орынбасары, "Сырбар" сыртқы барлау қызметі директорының бірінші орынбасары, директоры қызметтерін атқарған.
Бұған дейін "Сырбарды" басқарған Исатай Сартаев басқа жұмысқа ауысуына байланысты қызметінен босатылды.
Айта кетейік, Қалмұханбет Қасымов ішкі істер министрі қызметінен босатылып, Қазақстан Республикасы президентінің көмекшісі – Қауіпсіздік кеңесінің хатшысы болып тағайындалған болатын.