АСТАНА, 19 желтоқсан – Sputnik. Ұлттық экономика министрі Тимур Сүлейменов қазақстандықтарды Жаңа жыл қарсаңында азық-түлік бағасының өсуіне дайын болуға кеңес берді, деп хабарлайды Sputnik Қазақстан тілшісі.
Министрдің айтуынша, бағаны өсіріп отырған жекелеген адамдар емес, дүкені, бизнесі бар айналамыздағы адамдар, өзіміздің туысқандарымыз, достарымыз.
"Олардың әрекетін түсінуге болады. Себебі біз нарықтық экономикада өмір сүріп отырмыз. Сұраныс жоғары болғанда, баға әрдайым өседі", — деді Сүлейменов мәжіліс кулуарында.
Министр жазғы кезеңде бағасы шарықтайтын қонақ үй нөмірлерін мысалға келтірді.
"Бұл нарық, оған дайын болу керек. Сондықтан мемлекет қандай да бір әлеуметтік тауарларды алып, арнайы дүкендерде қиярды жазғы бағамен сатады деп үміттенуге болмайды. Мұны министрлік, үкімет жасап отырған жоқ, бұл нарық субъектілерінің әрекеті", — деді ол.
Десе де министр азық-түлік бағасын негізсіз шарықтатып жіберетін сатушылар жазасыз қалмайтынын ескертті.