АСТАНА, 13 қараша – Sputnik. Қазақстан мұсылмандары діни басқармасы әлеуметтік желілерде шу болып жатқан видеоға қатысты түсініктеме берді, деп хабарлайды Sputnik Қазақстан.
Қазақстан мұсылмандары діни басқармасы видеодағы мас ер адам мешіт қызметкері емес екенін мәлімдеді.
"Ордабасы ауданы Шұбар су ауылында дегендей, масаң күйде көше кезіп жүрген белгісіз азамат Қазақстан мұсылмандары діни басқармасының да, Түркістан облыстық өкілдігіне қарасты мешіттердің де қызметкері емес",- делінген хабарламада.
ҚМДБ ақпаратынша, ер адамның үстіндегі киімі мен басындағы сəлдесі мүфтияттың имамдарға арнап белгілеген үлгісінде емес.
"Бейнетаспаға түсіріп тұрған ауылдасы оны "Ақ тырна" деп атап шақырды. Сыраға сылқия тойған жанның кім екені ауылдастарына жақсырақ таныс. Сондықтан сəлде оранып, шапан кигеннің бəрі мешіттің молдасы емес", — деп хабарлады ҚМДБ баспасөз қызметі.