ҚАРАҒАНДЫ, 25 қазан — Sputnik. Қарағанды облысы Абай қаласында 12 адам тамақтан уланып, дәрігерлердің көмегіне жүгінген, олардың тоғызы ауруханаға жатқызылды. Белгілі болғандай, бәрі жергілікті дәмханада дөнер жепті.
"22 қазаннан бастап облыстық жұқпалы аурулар ауруханасына науқастар түсе бастады. Соңғы адам кеше кешкісін келген. Барлығы тоғыз адам ауруханаға түсті, олардың жетеуі – ересектер, біреуі тоғыз жастағы бала, тағы бірі – жасөспірім. Науқастардың айтуынша, бәрі бір дәмханадан дөнер алып жепті", — дейді облыстың денсаулық сақтау басқармасының баспасөз хатшысы Айжан Иса.
Науқастардың бәріне бірдей диагноз қойылды – жедел ішек инфекциясы. Қарағанды облысы қоғамдық денсаулық сақтау департаменті дөнерханада жоспардан тыс тексеріс жүргізіп жатыр.
Дөнерханада дезинфекция жасалып жатыр, ал қызметкер уақытша жұмыстан шеттетілген.
"Науқастармен араласқан адамдарды да анықтадық, дәрігерлер оларды мұқият бақылауда ұстап отыр. Аудан әкімдігіне, прокуратураға, полицияға жаппай инфекция жұқтырғандар туралы ақпарат жіберілді", — дейді ведомство.
Сынамаларды зерттеу нәтижесінде инфекцияның қайдан шыққаны белгілі болады. Содан соң дәмхана иесіне жаза тағайындалмақ.