АСТАНА, 22 қазан — Sputnik. Астанада қарт әйел бір ай ішінде жедел жәрдемді 106 рет шақырған.
Көмек сұраған әжей көптеген созылмалы дертке шалдыққан екен, деп жазады "Елорда Инфо" қалалық жедел жәрдем станциясына сілтеме жасап.
Жедел ақпараттық диспетчер бөлімінің жетекшісі Бота Сәдетханның айтуынша, дәрігерлер 86 жастағы әженің мекенжайын әбден жаттап алып, шақырған сайын барып отырған.
Зейнеткер кеуде қуысының ауыратынын айтып, шағымданған соң, "103" нөміріне түскен қоңырауына жауап бермеуге болмайтын еді.
Кейінірек әжейді қарттар үйіне апарыпты. Ол кісі енді жедел жәрдемге хабарласпайды.
Жедел жәрдем қызметінің форматы былтыр өзгеріске ұшыраған болатын: түскен шақыртулар төрт санатқа бөлінеді. Бұдан былай жедел жәрдем көмегіне жиі жүгінетін науқастарға емханалар көмектеседі, олар мекенжайға бригаданы немесе учаскелік дәрігерді жібереді.