АСТАНА, 5 қазан — Sputnik. Генерал Қасымовты мемлекетіміздегі ең тәжірибелі полицей ретінде білемін. Ол — адал әрі адамгершілігі мол жан. Осылай мақтады Қазақстан президенті Нұрсұлтан Назарбаев кезекті жолдауы кезінде, деп хабарлайды Sputnik Қазақстан тілшісі.
Елбасы Нұрсұлтан Назарбаев бүгінге күнге дейін халықты қорғау мақсатында 700-ден астам полицейдің қаза болғанын еске алды.
"Құқық қорғау органдарының жұмысына өзгерістер енгізу қажет. Өмір сапасы қауіпсіздікпен тікелей байланысты. Қылмыспен күрескенде ішкі істер органдарының қызметкерлері алдыңғы шепте жүреді және өмірлерін қатерге тігеді. Тәуелсіздік жылдарында 770 полицейдің өлгенін сіздердің ешқайсыларыңыз білмейсіздер. Әйтпесе, полицейлерді міндетті түрде жамандау керек деген пікір қалыптаспайтын еді. Халық бір нәрсе бола қалса, соларға көмек сұрап жүгіреді. Полиция адамның көмекшісіне айналуы тиіс. Керісінше оларды жазалайтын таяқ болмаулары керек", — деді президент.
Әрі қарай Елбасы Қасымовқа қатысты пікірін білдіріп, оның өзі білетін ең адал адамдардың бірі екенін айтып өтті.
"Мен генерал Қасымовты мемлекетіміздегі ең тәжірибелі полицей деп санаймын. Ол адал әрі адамгершілігі мол жан. Әрі қарай не істеу керектігін оның өзі ұсынады деп ойлаймын. Бізде бағдарламалар бар. Жаңғырту бойынша ішкі істер органдарының жұмысына қатысты "Жол картасын" қабылдау қажет. Бұған 2019 жылы старт берген жөн", — деді президент.
Мұнымен қатар, Нұрсұлтан Назарбаев Қасымовтың бұл салада әлемдік дәрежеде тәжірибесі бар екенін айтып өтті.
"Полицияның қалай жұмыс істеу керектігі туралы тәжірибе бар. Мен сізді Германияға да, Грузияға да жібердім. Олардың осы мәселені қалай жолға қойғандарын қараңыздар. Шетелде полицейлер көшеде тұрып алып пара алмайды. Тек көлікпен жүреді. Сондай-ақ, олардың саны аз болады ", — деді мемлекет басшысы.