АСТАНА, 23 қыркүйек — Sputnik. Челябинскте екінші сынып оқушысының ата-анасы баласын ренжіткен жасөспірімді үзіліс кезінде ұрып тастады.
Жаға ұстатарлық оқиға 20 қыркүйекте №42 мектепте болған. Үзіліс кезінде екінші сынып оқушысының әкесі ұлын ренжіткен бесінші сынып оқушысын ұрып тастаған. Ер адам жасөспірімнің мойнынан ұстап алып, іштен тепкілей бастаған. Бұған қоса, баланы балағаттаған. Оқушы ер адамнан құтылып, көшеге жүгіріп шыққанда, оны әлгі сабаған адамның әйелі ұстап алған.
Осыдан кейін ерлі-зайыпты баланы жабылып сабай бастаған. Мұны көрген мұғалімдер дереу оқушыға араша түсіп, жанжалды тоқтатты. 5-сынып оқушысы ауруханаға жеткізілді.
Зардап шеккен баланың анасы полицияға шағымданған, аталған факті бойынша тексеріс жүріп жатыр, деп жазады URA.RU.
Челябинск облысындағы бала құқықтары жөніндегі уәкіл Ирина Буторина дүйсенбіден бастап жан-жақты тексеріс жүргізетінін мәлімдеді.
Базарда жұрт күдіктіні өздері жазалады
"Оқиғаның мән-жайын анықтаймыз, дүйсенбіден бастап кірісеміз. Мектеп тарапынан барлық қажетті шара қолға алынған-алынбағанын тексеріп, лауазымды тұлғалардың әрекетіне баға береміз", — деді ол.
Білім беру мекемесі аталған оқиғаға қатысты түсініктеме берген жоқ.