АСТАНА, 7 қыркүйек — Sputnik. Қазақстанның көкпар құрамасы Дүниежүзілік көшпенділер ойындарындағы жарысын аяқтап, елге қола жүлдемен оралады.
Қазақ көкпаршылары мәскеулік қарсыластарына 3-орын алуға ешқандай мүмкіндік қалдырмады.
Отандастарымыз ресейліктерді 17:1 есебімен ойсырата ұтқан.
Биыл Дүниежүзілік көшпенділер ойындарындағы көкпар жарысының финалында әдеттегі "азиялық эль-классико" – Қазақстан мен Қырғызстан тартысы болмайды.
Қазақстан құрамасы жартылай финалда өзбектерден жеңіліп, жұрттың жағасын ұстатты. Тіпті ұлттық құрамаға қырғыздардан қорқып, әдейі жеңілді деген сын айтылды.
Қазақстанның көкпар федерациясы түсіндіргендей, Көшпенділер ойындарына тәжірибе жинау үшін жас көкпаршылар жіберілген.
Қазақстан Дүниежүзілік көшпенділер ойындарында жалпы есепте 3-орында тұр.