АСТАНА, 26 тамыз — Sputnik. Жастар арасында биатлоннан екі дүркін әлем чемпионы Дмитрий Шамаев Астана әуежайында ер адамның өмірін құтқарып қалды.
Ресейлік Дмитрий Шамаев "Нұрсұлтан Назарбаев" әуежайында эпилепсиясы ұстап қалған ер адамға жедел жәрдем келгенше алғашқы көмек көрсеткен. Спортшының батыл қадамы жайында "Школа биатлона в Удмуртии" парақшасында жазылыпты.
Ресейдің спорт шебері Дмитрий Шамаев 1995 жылы маусымда Удмурт республикасында дүниеге келген. Спортшы Ресей чемпионатының жүлдегері болып, жастар арасында екі рет әлем чемпионы атанған.