АСТАНА, 7 тамыз — Sputnik. Британ ғалымдары кәрілікке қарсы препарат ойлап тапты, деп хабарлайды РИА Новости MedicalXpress басылымына сілтеме жасап.
Эксетер университетінің мамандары жаңа AP39, AP123 және RT01 қосылыстарына зерттеу жүргізіп, олардың қан тамырларының ішкі қабатындағы жасушаларға әсерін бақылады. Нәтижесінде ғалымдар ұлпалардың қартаюын баяулатып, "кәрі" жасушалардың санын төмендетуге қол жеткізген.
Олар атап өткендей, AP39, AP123 және RT01 препараттары жасушадағы митохондрияны күкірт сутекпен қамтамасыз етіп, нәтижесінде кәрі және зақымданған жасушаларда қызмет ету мерзімін ұлғайтып, қартаю процесін тоқтатуға қажетті энергия пайда болады.
Ғалымдардың айтуынша, бұл қосылыстар негізінде жасалған дәрі-дәрмектер адамның өмір сүру жасын ұлғайтып қана қоймай, сапасын да жақсартады. Сонымен бірге жүрек талмасы және инсульт сияқты дерттердің алдын алады.