АСТАНА, 15 шілде – Sputnik. Қазнетте әнші MAKVIN-нің (Нұрболат Базарбаев) үйлену тойынан жарияланған видео біраз шу туғызды. Оған себеп – музыкант қалыңдығының ерекше шаш үлгісі, деп хабарлайды Sputnik Қазақстан.
Тақырбас қалыңдық желі қолданушыларының көбін "таңғалдырғаны" рас. Той видеосын көрген қазақстандықтардың пікірі екіге жарылды. Бірі қалыңдықты даттаса, енді бірі мақтап жатыр.
"Дəстүрді өзіміздің қазақ жігіттері немесе қазақ қыздары түсініп, қастерлемесе, қазақтың болашағы дүбəрə болады! Келін болып түсіп жатқан қыздың істеген ісіне "мұның дұрыс емес" дейтін көзі ашық, санасы ояу адам болмағаны ғой!", — деп ашынып жазған қолданушылардың бірі.
Ал енді бірі "Сондай керемет, жарайсың!" деп мақтаған.
"Бас аман болса, шаш шығады ғой! Өзіне жарасып тұр, өмір бір рет ғана беріледі. Өзіне ұнаса болды. Ең бастысы бақытты болсын!, — дейді тағы бірі.